ഒരു മുന്നാര്‍ യാത്ര

തലക്കെട്ട്‌ കാണുമ്പൊള്‍   നിങ്ങള്‍ വിചാരിക്കും, ഹും ഞങ്ങളും മൂന്നാര്‍ പോയിട്ടുണ്ടല്ലോ എന്ന്. പക്ഷെ ഇത് റൂട്ട് വേറെയാണ് - തമിഴ് നാട്ടിലെ ഉദുമല്‍ പേട്ടയില്‍  നിന്നും മൂന്നാറിലേക്ക് - സ്റ്റേറ്റ് ഹൈവേ 17 വഴി - എന്തെങ്കിലും വ്യത്യസ്തത  വേണമല്ലോ. 

എന്‍റെ അനുജന്‍ മറയൂര്‍ പഠിക്കുമ്പോഴാണ് ഞാന്‍ ആദ്യമായി തമിഴ് നാട്ടിലുടെ മൂന്നാറിലേക്ക്  യാത്ര ചെയ്യുന്നത്. കോയമ്പത്തൂര്‍ നിന്നുമാണ് ഞാന്‍ യാത്ര തുടങ്ങിയത്. കോയമ്പത്തൂര്‍ നിന്നും പൊള്ളാച്ചി അവിടെ നിന്നും ഉദുമല്‍പേട്ട  (ഉടുമലൈ എന്നാണ് തമിഴില്‍)  വഴിയാണ് മറയൂര്‍ എത്തിച്ചേര്‍ന്നത്. ഉദുമല്‍ പേട്ടയില്‍ നിന്നും മൂന്നാറിലേക്ക് ആകെ ഒരു പാത മാത്രമേ ഉള്ളൂ. അതാകട്ടെ സ്വാതന്ത്രത്തിനു മുന്‍പ് ബ്രിട്ടിഷുകാര്‍ നിര്‍മ്മിച്ചതും. അത് കൊണ്ട് തന്നെ ആ പാത ഇപ്പോഴും താറുമാറാകാതെ നില നില്‍ക്കുന്നു. 

ഉദുമല്‍ പേട്ടയില്‍ നിന്നും പോകുമ്പോള്‍ കാണുന്ന ഒന്നാണ് കാറ്റാടികള്‍. ദൂരെ നിന്നും നോക്കുമ്പോള്‍ ഏതോ രാക്ഷസന്‍ നമ്മെ നോക്കി കൈ കാണിക്കുകയാണെന്ന്  തോന്നും. ഈ റോഡിലുടെ പോകുമ്പോള്‍  ആരെയും ആകര്‍ഷിക്കുന്ന ഒന്നാണത്. 

ഇതെല്ലം പിന്നിട്ടു മുന്നോട്ടു പോകുമ്പോള്‍ കാണുന്ന കാഴ്ചകള്‍ എല്ലാം തന്നെ വളരെ ഭംഗിയാണ്. രണ്ട് വശവും മരങ്ങളും പിന്നെ കുറെ ദൂരെയായി മലകളും കൊണ്ട് പ്രകൃതി തന്നെ ഒരു കാന്‍വാസ് ആയി മാറുന്നതു നമുക്കിവിടെ കാണാം.

കുറേക്കൂടി മുന്നോട്ടു പോയാല്‍ അമരാവതി മലയിലെക്കും മൂന്നാരിലെക്കുമായി റോഡ്‌ തിരിയുകയാണ്. അമരാവതിയില്‍ തമിഴ് നാടിന്‍റെ വക ഒരു കടുവ സങ്കേതം കൂടി യുണ്ട്. അവധി ദിവസം ആയതു കൊണ്ടാണോ എന്നറിയില്ല, വന്‍ തിരക്കായിരുന്നു ബസ്സില്‍.

പിന്നെയുള്ള യാത്ര നയന മനോഹരങ്ങള്‍ തന്നെ. പച്ചപ്പ്‌ കലര്‍ന്ന മരങ്ങള്‍ക്കിടയിലൂടെ കറുത്ത നാഗം ഇഴഞ്ഞു പോകുന്ന പോലെയുള്ള റോഡും രണ്ട് വശവും മലകളും എല്ലാം കൂടി പ്രകൃതിയുടെ സകല സൗന്ദര്യവും നമുക്കിവിടെ കാണാം.

 

യൂറോപ്പിലെയും മറ്റും സുന്ദരങ്ങളായ ചിത്രങ്ങള്‍ ഇതിന്‍റെ മുന്‍പില്‍ ഒന്നുമല്ല എന്ന് തോന്നിപ്പോകും. 

 

 തമിഴ് നാടിന്‍റെ അതിര്‍ത്തി പ്രദേശം എത്തിയപ്പോഴാണ് ബസ്സിലെ തിരക്കിന്റെ കഥ മനസ്സിലാകുന്നത്‌.  കേരള - തമിഴ് നാട് അതിര്‍ത്തിയില്‍ ഒരു അമ്പലം ഉണ്ട്. മംഗള ദേവി ക്ഷേത്രം. വളരെ പ്രസിദ്ധമായ ഒരു അമ്പലം ആണിത്. (നേരത്തെ അറിയാഞ്ഞത്  കൊണ്ടും സമയക്കുറവു മൂലവും ഞാന്‍ അവിടെ ഇറങ്ങിയില്ല).

എങ്കിലും കേരളത്തിനെയും തമിഴ് നാടിനെയും വേര്‍തിരിക്കുന്ന ചിന്നാര്‍ നദിയുടെ അടുത്താണ് ആ അമ്പലം സ്ഥിതി ചെയ്യുന്നത്. മുകളില്‍ കാണുന്ന ചിത്രം ആ നദിയുടെ മുകളിലുടെ കേരളത്തിലേക്ക് കടക്കുന്ന പാലമാണ്. ഈ പാലത്തിന് മുന്‍പ് തമിഴ് നാടിന്‍റെ ഒരു ചെക്ക്‌ പോസ്റ്റ്‌ ഉണ്ട്. ഫോറെസ്റ്റ് ഗാര്‍ഡുമാര്‍ വന്നു ബസ്സെല്ലാം ഓടിച്ചു നോക്കിയിട്ട് പോയി.

കേരളത്തിലേക്ക് കടന്നപ്പോള്‍ തന്നെ നമ്മുടെ നാടിന്‍റെ ആ മനോഹാരിത വീണ്ടും കാണാന്‍ കഴിഞ്ഞു. ആനമുടിയുടെ ആ സൌന്ദര്യം ഒന്ന് എടുത്തു പറയേണ്ടത് തന്നെ.

പിന്നെ എവിടെ നിന്നും നോക്കിയാല്‍ കാണുവാന്‍ കഴിയുന്ന ചിന്നാര്‍ വാച് ടവര്‍.

വഴിക്ക് കാണുന്ന കൊച്ചു കൊച്ചു ക്ഷേത്രങ്ങളും കളകളം പടിയോഴുകുന്ന ചിന്നാറും   എല്ലാം തന്നെ കണ്ണുകള്‍ക്ക്‌ ആനന്ദം നല്‍കുന്നവ തന്നെ.

പിന്നെ കേരളത്തിന്‍റെ വൃക്ഷമായ തെങ്ങുകള്‍ അവിടവിടെയായി കാണുവാന്‍ തുടങ്ങി. (മലയാളികള്‍ എവിടെ പോയാലും കൊണ്ടുപോകുന്ന ഒന്നാണല്ലോ തേങ്ങ.)

പിന്നെ കുറെ ഹെയര്‍ പിന്‍ വളവുകളും ഒരു വശം കൊക്കയും ഒരു വശം മലയുമായ റോഡുകളും.

അങ്ങിനെ കുറെ ദൂരം യാത്ര ചെയ്തു മറയൂര്‍ എത്താറായപ്പോള്‍ ഒരു ബോര്‍ഡ്‌ കണ്ടു.

മറയൂര്‍ പല തരം കൃഷികള്‍ ഉണ്ട്. ആപ്പിള്‍, പീച്, സ്ട്രോബെറി, കാരറ്റ്, കാബേജ്, കരിമ്പ് മുതലായവ ഇവിടെ കാണാം. പ്രധാനമായും കരിമ്പ്‌ സംസ്കരിച്ചു ശര്‍ക്കര ഉണ്ടാക്കല്‍.

 

 

 ഒരു ദിവസം അനുജന്‍റെ അടുത്ത് തങ്ങിയ ശേഷം പിറ്റേ ദിവസം വീടും യാത്ര ആരംഭിച്ചു. ക്ഷമിക്കണം, അവിടുത്തെ രണ്ട് പ്രധാന ആകര്‍ഷണ കേന്ദ്രങ്ങള്‍ ഇവയാണ് - ചന്ദന മരക്കാടുകളും, മുനിയറകളും. (ചന്ദന ക്കാടുകള്‍ എല്ലാം തന്നെ ഫോറെസ്റ്റ് കാര്‍ കമ്പി വേലി കെട്ടി സംരക്ഷിചിരിക്കുകയാണ് - കളവു പോകാതിരിക്കാന്‍!)

 

 

മുക്കാല്‍ മണിക്കൂര്‍ കൂടി യാത്ര ചെയ്തപ്പോള്‍ മൂന്നാര്‍ കാണുവാന്‍ തുടങ്ങി. മുന്‍പ് ഞാന്‍ പറഞ്ഞത് പോലെ കേരളത്തിന്‍റെ കാശ്മീര്‍ എന്ന് പറയുന്ന പോലെ തന്നെ. 

മൂന്നു ആറുകള്‍ കൂടിച്ചേരുന്ന മൂന്നാര്‍. തമിഴ് മലയാള സംസ്കാരങ്ങള്‍ കൂടി ചേര്‍ന്നതാണ് മൂന്നരിന്റെത്. അത് പോലെ തന്നെ മൂന്നു കുന്നുകളിലായി മൂന്നു മത വിഭാഗങ്ങളുടെ ആരാധനാലയങ്ങളും.

 ഫ്രഷ്‌ ആയ പച്ചക്കറികള്‍ കിട്ടുന്ന സ്ഥലം കൂടിയാണത്. പിന്നെ കേരളത്തിലെ തേയില കൃഷിയുടെ തലസ്ഥാനവും.

റോഡിലെല്ലാം കണ്ണന്‍ ദേവന്‍ ഹില്‍സ് കമ്പനിയുടെ (പഴയ ടാറ്റാ ടീയുടെ) ട്രാക്ടറുകള്‍ ആണ്. നുള്ളിയെടുത്ത തേയില നിറച്ച ചാക്ക് കെട്ടുകളുമായി ഏതോ ഭൂതം പോകുന്ന പോലെ ശബ്ദം ഉണ്ടാക്കി പോകുന്ന ഇവ നോക്കി നില്‍ക്കാനും ഒരു രസം തന്നെ. 

 

അങ്കിളിന്റെ ശിശിരം ഹോം സ്റ്റേയില്‍ ചെന്നപ്പോള്‍ വളരെ അത്ഭുതം ആയി. വളരെ ഭംഗിയായി ക്രമീകരിച്ചിരിക്കുന്നു - അങ്കിള്‍ മാത്രമല്ല പ്രകൃതി കൂടി. താഴെയുള്ള ചിത്രം നോക്കൂ.

 

മൂന്നാറില്‍ എത്തിയപ്പോള്‍ തോന്നി ഒന്ന് കുണ്ടലയില്‍ പോയാലോ എന്ന്. ടോപ്‌ സ്റ്റേഷന്‍ ബസ്സില്‍ കയറി പോകുമ്പോള്‍ മാട്ടുപ്പെട്ടി എത്തിയപ്പോള്‍ ഒന്ന് ഇറങ്ങി - ഡാമും പരിസരവും കാണുവാന്‍.

മാട്ടുപ്പെട്ടി ഡാമില്‍ നിന്നും കുറച്ചു കൂടി സഞ്ചരിച്ചപ്പോള്‍ ഇന്‍ഡോ സ്വിസ് പ്രൊജക്റ്റ്‌ വക നല്ല തടിച്ചു കൊഴുത്ത മാടുകള്‍ അവിടവിടെയായി മേഞ്ഞു കൊണ്ടിരിക്കുന്നു. 

 

അവിടെ നിന്നും കുറച്ചു ദൂരം കൂടി സഞ്ചരിച്ചപ്പോള്‍ കുണ്ടല ഡാമിന്റെ ബോര്‍ഡുകള്‍. 

പരിസര പ്രദേശങ്ങള്‍ എല്ലാം ടൂറിസ്റ്റുകളെക്കൊണ്ട് നിറഞ്ഞിരിക്കുകയാണ്. ഡാമിലെ ബോട്ടിങ്ങിന് വന്‍ തിരക്കാണ്. 

 

ടോപ്‌ സ്റ്റേഷന്‍ കൂടി സന്ദര്‍ശിക്കണം എന്നുണ്ടായിരുന്നു, പക്ഷെ സമയക്കുറവു മൂലം അതിനു സാധിച്ചില്ല. ഏതായാലും അടുത്ത പ്രാവശ്യം കാണാം എന്ന് കരുതി കുണ്ടളയില്‍ താമസിക്കുന്ന വേറൊരു അങ്കിളിന്റെ വീട്ടിലേക്കു പോയി.

തല്ക്കാലം വിട.

.