തോമസ്‌ ചേട്ടന്‍റെ അപ്പന്‍റെ ഫോട്ടോ

നിങ്ങള്‍ വിചാരിക്കും, ഇതെല്ലം  മുന്‍പ്  കണ്ട ആ സിനിമകിളിലെ തമാശകള്‍  അല്ലേയെന്നു.  എന്നാല്‍ അതു ശരിയല്ല, ഞങ്ങളുടെ നാട്ടില്‍ നടന്ന സംഭവങ്ങളായിരുന്നു അതെല്ലാം. ഇവിടെ അതു പ്രചരിച്ചു പ്രചരിച്ചു അവസാനമത് സിനിമയിലെ ചില ആളുകളുടെ കയ്യിലെത്തി. (ഈ വ്യക്തികള്‍ക്ക് പള്ളിപ്പുറവും ആയി ബന്ധം ഉണ്ടെന്നത് പരസ്യമായ രഹസ്യം ആണ്).

തോമസ്‌ ചേട്ടന്‍ നാട്ടിലെ പ്രധാന വ്യക്തിത്വം ആയിരുന്നു. (ഇപ്പോള്‍ ജീവിച്ചിരിപ്പില്ല). കോണ്‍ഗ്രസ്‌ പാര്‍ട്ടിയുടെ ഒരു പ്രധാന പ്രവര്‍ത്തകന്‍ ആയിരുന്നു അദ്ദേഹവും മാതാപിതാക്കളും. അറിയപ്പെടുന്ന ഒരു സ്വാതന്ത്ര്യ സമര സേനാനി ആയിരുന്നു അദ്ദേഹത്തിന്റെ അപ്പന്‍. അതിനാല്‍ ത്തന്നെ വീട്ടിലെ ഉമ്മറപ്പടിയില്‍ എല്ലാവരും കാണുവാനായി  ധാരാളം കോണ്‍ഗ്രസ്‌ പാര്‍ട്ടി നേതാക്കളുടെ പടങ്ങളും ഫ്രെയിം ചെയ്തു വെച്ചിട്ടുണ്ട്. 

കഥാപാത്രത്തിന്റെ  പേര് പറയുന്നില്ല (പറഞ്ഞാല്‍ പള്ളിപ്പുറത്തെ എല്ലാവരും അറിയും) അതിനാല്‍ അദ്ദേഹത്തെ  നമുക്ക് എസ് എന്ന് പറയാം. പെട്ടെന്ന് പണം വന്നു  നാട്ടില്‍ പ്രമുഖനയതാണ്. അതിനാല്‍ത്തന്നെ വിദ്യാഭ്യാസം കുറവുമാണ്. (സ്കൂളില്‍ പോയിട്ടുണ്ടോയെന്നു ചോദിച്ചാല്‍ കൂട്ടുകാരനെ വിളിക്കാന്‍ പോയിട്ടുണ്ടെന്ന് പറയും). പക്ഷെ പണത്തിനു മീതെ പരുന്തും പറക്കില്ല എന്നാണല്ലോ പുതിയ മമ്മൂട്ടി പടം പോലും പറയുന്നത്. (മോഹന്‍ലാല്‍ ഫാന്‍സ്‌ ക്ഷമിക്കുക). പണം ഉള്ളത് കാരണം ധാരാളം സില്‍ബന്തികള്‍  ചുറ്റും കൂടി അദ്ദേഹത്തെ ഒരു ചെറിയ നേതാവ് പോലും ആക്കി.  നാട്ടില്‍ എന്ത് പ്രശ്നമുണ്ടായാലും ഇടപെട്ടു സംഭവം തീര്‍ക്കുക അദ്ദേഹത്തിന്‍റെയും കൂട്ടരുടെയും ഒരു ഹോബി ആവുകയും ചെയ്തു.

അങ്ങിനെയിരിക്കെ ഒരു ദിവസം ബഹുലെയനും ജോസ ചേട്ടനും തമ്മില്‍ ഒരു അതിര് തര്‍ക്കം വന്നു. തന്‍റെ പണിക്കാരനായ ബഹുലെയനെ രക്ഷിക്കുവാന്‍ നമ്മുടെ കഥാപാത്രം എസ് മുനമ്പം പോലീസ് സ്റ്റേഷനില്‍ വന്നു. സബ് ഇന്‍സ്പെക്ടര്‍ ആയി സംസാരിച്ചു കൊണ്ടിരിക്കുമ്പോള്‍ സ്റ്റേഷനില്‍ വച്ചിട്ടുള്ള ഗാന്ധിജിയുടെ പടം എസ് പ്രത്യേകം ശ്രദ്ധിച്ചു. 

സ്റ്റേഷനില്‍ നിന്നും ഇറങ്ങിയ ഉടനെ തന്‍റെ സില്‍ബന്തിയായി കൂടെ നടക്കുന്ന പോളിനോട് എസ് ചോദിച്ചു, 

"എങ്ങിനെയാടോ തോമസ്‌ ചേട്ടന്‍റെ അപ്പന്‍റെ ഫോട്ടോ പോലീസ് സ്റ്റേഷനില്‍ വന്നത്?"

ഈ പോളാണ് സംഭവം ഇത്ര ഫ്ലാഷ് ആക്കിയത്. (ഇത് സത്യമാണോ എന്ന് ഇപ്പോഴും സംശയം ഉണ്ടെങ്കില്‍ നിങ്ങള്‍ക്ക് ഇയാളോട് ചോദിച്ചു നോക്കാം - ശ്രീ ജോണ്‍സന്‍ അച്ചാരുപറമ്പില്‍)

.